Թուրքիայի կողմից Կիպրոսի ափերին սկսված նավթագազային հորատման աշխատանքների պատճառով շարունակում են լարված մնալ թուրք-կիպրական հարաբերությունները:
Հունիսի 10-ին Կիպրոսի Հանրապետության ղեկավարությունը հայտարարել էր, որ որոշում է ընդունվել կղզու ափերի մոտ անօրինական հորատման աշխատանքներ իրականացնող թուրքական նավի անձնակազմին ձերբակալել:
Այս հայտարարությանը հետևեցին թուրքական կողմի արձագանքները, որոնցից ուշագրավ է Թուրքիայի «Պահպանողական առաջընթաց կուսակցության» (MYP) նախագահ Ահմեթ Ռեյիզ Յըլմազի արձագանքը:
Վերջինս առաջարկել է մի կողմ թողնել օրենքի ճանապարհը և հարվածել Կիպրոսի հույներին:
«Հույները ոչ թե օրենքով, այլ ապտակով են հասկանում»,- ասել է թուրք գործիչը՝ նշելով, որ խոսքով որևէ մեկին հնարավոր չէ վախեցնել:
«Լուրջ պետությունը չի խոսում, հարմար պահին հարվածում է: Մի անգամ Օզալը (Թուրքիայի 8-րդ նախագահ) ասաց. «Մեծ աղետ կլինի՞, եթե Հայաստանի վրա մի ռումբ գցենք»: Դրա հետևանքով ինչ ասես եկավ նրա գլխին:
Այժմ պայմաններն ավելի վատ են, քան այն ժամանակ: Թուրքիայի տարածքային ջրերը զավթված են: Թուրքական ծովերը պաշարված են: Հույները, հայերն ու աշխարհի այլ ազգերը վրեժի մոլուցքով շրջափակել են մեզ: Սցենարը նույնն է, դերակատարները՝ նույնպես:
Արդեն անցել է խոսքերի վրա ժամանակ կորցնելու պահը»,- ասել է թուրք ազգայնական գործիչը:
Հիշեցնենք, որ Վաշինգտոնը Թուրքիայից պահանջում է դադարեցնել հորատման աշխատանքները Կիպրոսի ափերին:
ԱՄՆ-ին անհանգստացրել է Թուրքիայի արտգործնախարար Մևլութ Չավուշօղլուի հայտարարությունը, ըստ որի՝ Միջերկրական ծովում՝ Հյուսիսային Կիպրոսի թուրքական ինքնահռչակ հանրապետության ափերին, սկսվելու են նավթի և գազի հորատման աշխատանքներ:
Թեմային արձագանքել է ԱՄՆ-ի պետքարտուղարության խոսնակ Մորգան Օրտագուսը:
«ԱՄՆ-ն խորապես անհանգստացած է Կիպրոսի Հանրապետության բացառիկ տնտեսական գոտում Թուրքիայի կողմից հորատման աշխատանքներ սկսելու կապակցությամբ։ Կոչ ենք անում Թուրքիայի դադարեցնել այդ գործողությունները և բոլոր կողմերին հորդորում ենք դրսևորել զսպվածություն»։
Նշենք, որ Թուրքիան համարում Է, որ Կիպրոս կղզու հարստություններից կարող են օգտվել թե՛ Կիպրոսի թուրքական ինքնահռչակ հանրապետությունը և թե՛ Կիպրոսի Հանրապետությունը։ Սակայն հունական կողմը դրան դեմ է և դա համարում է անօրինական քայլ։
Աղբյուրը՝ www.ermenihaber.am