Դա հավատալու չէ․ Գյումրու սպանության վարկածները ֆանտաստիկայի ժանրից են. Էլդա Գրին

Grin-Elda-1«Առաջին լրատվական»-ի զրուցակիցն է հոգեբանական գիտությունների դոկտոր, պրոֆեսոր, դատաբժշկական փորձագետ, հրապարակախոս Էլդա Գրինը:

-Տիկին Գրին, վստահ եմ, հետևել եք Գյումրիում տեղի ունեցած դաժան սպանության դեպքերին: Դուք՝ որպես մասնագետ, ինչ գնահատական կտաք կատարվածին: Ինչպե՞ս է հնարավոր, որ մեկ անձը գնար 7 հոգու սպանության:

-Դե, այդ հարցին հստակ պատասխան տալ հնարավոր չէ, քանի որ պետք է մի շարք փորձաքննություններ կատարվեն: Սակայն ինձ համար շատ տարօրինակ և անհասկանալի հարցեր կան: Մասնավորապես՝ տպավորություն է, որ և́ այդ զինվորի ծառայության վայրում՝ ռազմաբազայում, և́ ամբողջ Գյումրիում կարծես բոլորը լեթարգիական քուն էին մտել այդ օրը, քանի որ ոչ ոք չի նկատել, թե նա ինչպես է դուրս եկել ռազմաբազայից, ինչպես է քայլել քաղաքով: Ոչ էլ նկատել են, թե ինչպես է նա կոտրել Ավետիսյանների տան դռան ապակին, ապա նաև կրակոցները: Ոչ ոք, ոչ մի շունչ չի տեսել ու չի լսել այդ օրվա դեպքերը: Դա հավատալու չէ:

-Իսկ հնարավոր համարո՞ւմ եք, որ կասկածյալն իր հետևից այդքան հետք թողներ՝ հագուստ, զենք, անվանական կոշիկներ: Հնարավո՞ր է այդպես:

-Իմ պրակտիկայից կարող եմ ասել, որ հիմնականում, շատ քիչ բացառությամբ հանցագործը, մանավանդ մարդասպանը, աշխատում է հետքերը թաքցնել և ոչ թե տվյալ դեպքում շորերը կոշիկները թողնել ու ակնհայտորեն ցույց տալ, որ ինքն է արել: Դա անհնար է, խելքին մոտ բան չէ: Հոգեբանորեն դա առնվազն տարօրինակ է: Իսկ տվյալ դեպքում ճիշտ հակառակն է: Նա իբր ուզել է ջուր խմել, բայց դրա համար Գյումրիում շատ ցայտաղբյուրներ կան, որոնցից նա կարող էր ջուր խմել, և պարտադիր չէր 3 կիլոմետր ճանապարհ անցնել դրա համար: Այս ամբողջ պատմությունը լկտիության աստիճանի հասնող սուտ է:

Եվ հետո, շատ կարևոր է այն հանգամանքը, որ սպանվածները տարբեր սենյակներում են քնել, ու ինչպե՞ս կարողացավ նա մի քանի վայրկյանում բոլորին ոչնչացնել, որ ոչ ոք ոչ դիմադրեց, ոչ կարողացավ շարժվել, ոչ մի բան: Սա ևս ֆանտաստիկայի ժանրից է: Եվ սա ևս իմ կարծիքով կատարյալ սուտ է: Եվս մեկ դիտարկում. ինչպե՞ս կարողացավ նա այդ ցրտին այդքան արագությամբ գնալ հասնել Բայանդուր գյուղ, որ կրկին ոչ ոք չի նկատել: Սա ևս հանելուկային է և նույնպես ինձ հավատ չի ներշնչում: Միայն լուսանկարներից ինձ համար պարզ է, որ նա բավական լկտի և ինքնահավան տղա է, բայց պնդում եմ՝ միայն փորձաքննությունները կտան այդ հարցերի պատասխանները:

-Տիկին Գրին, ինչպիսի՞ փորձաքննություններ պետք է նշանակվեն, որոնք կկարողանան տալ այն բոլոր հարցերի պատասխանները, որ այս օրերին ծագում են հասարակության մեջ։

-Համալիր դատաբժահոգեբանական փորձաքննություններ: Պետք է պարզել՝ նա հոգեկան հիվանդություն ունի՞, թե՞ ոչ: Չնայած բանակ զորակոչվելուց նա արդեն իսկ անցել է այդ հետազոտությունը, և հարց է՝ եթե նա խնդիրներ է ունեցել, ապա ինչպե՞ս է հայտնվել բանակում: Բայց արդեն պարզ է, որ փորձաքննությունները կատարելու են ռուսները, և արդեն հույսը, թե ճշմարտությունը կբացահայտվի, մարում է:

-Երեկ լրատվամիջոցներում հրապարակվեցին որոշ կադրեր Պերմյակովի հարցաքննությունից: Դուք՝ որպես հոգեբան, ինչպե՞ս կբնութագրեք նրան և, առհասարակ, ինչ տպավորություն ստացաք այդ կադրերից:

-Կրկնում եմ, իմ դիտարկմամբ՝ նա լպիրշ և ինքնահավան տղա է, բայց դեմքին ագրեսիա չկա: Եվ այդպես լինում է: Այս դեպքում ես կարծում եմ, որ տվյալ անձնավորությունը բավական պրիմիտիվ է, որպեսզի այդպիսի բան աներ և նման խաղեր խաղար:

Պերմյակովը, մեծահասակներից զատ, սպանել է նաև երկու մանկահասակ երեխայի: Ինչպիսի՞ հոգեբանական նկարագիր ունեցող անձինք են ունակ նման արարքի:

-Գիտեք ինչ, մարդասպանները ընդհանրապես աչքի են ընկնում ինտելեկտի ցածր մակարդակով, ագրեսիվությամբ, իմպուլսիվությամբ: Ես այդ անձին չեմ տեսել դեմ առ դեմ, որ ասեմ, բայց, ամենայն հավանականությամբ, այդ անձին հատուկ են պատրաստել, գուցե սադիստական պահեր կան, և վերջում՝ գուցե առհասարակ նա կապ չունի այդ սպանության հետ: Ինչ իմանաս: Միայն համալիր փորձաքննությունների արդյունքները կտան այս հարցերի պատասխանները: Եվ եթե դրանք մեզ մոտ արվեին, ես կարող էի երաշխիք տալ, որ դրանք կարվեին բարձր մակարդակով և օբյեկտիվ: Բայց թեե Ռուսաստանում ինչ կարվի՝ պարզ չէ:

-Տիկին Գրին, հնարավոր համարո՞ւմ եք, որ նա անմեղսունակ ճանաչվի, ինչպես այս օրերին խոսվում և քննարկվում է:

-Անմեղսունակության վարկածն առհասարակ չպետք է քննարկել: Նա ծառայել է բանակում: Սովորաբար բանակում չեն ծառայում ոչ միայն անմեղսունակ, այլև որոշ շեղումներ ունեցողները: Եթե անձը չնչին շեղումներ է ունենում, կլինիկայում նման բուժում է ստանում, հոգեբաններն արդեն զգուշանում են: Անմեղսունակության վարկածը ևս աբսուրդի տիրույթից է:

http://www.1in.am/1531352.html

 

бутон за споделяне

You can skip to the end and leave a response. Pinging is currently not allowed.

Leave a Reply

Powered by WordPress | Designed by: All Premium Themes Online. | Thanks to Top Bank Free Premium WordPress Themes, wordpress themes 2012 and
©Բոլոր իրավունքները պաշտպանված են: Մեջբերումներ անելիս հղումը www.norkhosq.net-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.norkhosq.net-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Նոր խոսք» ի ստորագրությամբ նութերի, կարծիքների եւ դիրքորոշումների համար: All Rights Reserved, www.norkhosq.net, info@norkhosq.net