ՀՀ ՆԱԽԱԳԱՀ ՍԵՐԺ ՍԱՐԳՍՅԱՆԻՆ

Ողջախոհության կոչ

ՀՀ ոստիկանության պարեկապահակային ծառայության գնդի գրավման հետևանքով ստեղծված վիճակի վերաբերյալ

Այսօր ողջ հայության մտահոգ միտքն ու հոգին սեւեռված է Հայաստանի Հանրապետությունում, ի մասնավորի ՀՀ ոստիկանության պարեկապահակային ծառայության գնդի գրավման հետևանքով, ստեղծված դեպքերին ու դրանից բխող անկանխատեսելի հետեւանքներին ու զարգացումներին:

Լատվիայի, Լիտվայի և Էստոնիայի հայկական միությունները՝ կիսելով սույն մտահոգությունը, առաջին հերթին կոչ են անում ՀՀ իշխանություններին եւ զինված խմբի անդամներին իրադրությունը  չսրելու եւ հավելյալ մարդկային կյանքեր չխլելու նպատակով դրսևորել համբերատար  մոտեցում:

Պահանաջում ենք ամեն գնով հրաժարվել ուժի կիրառումից եւ հարցի լուծման համար գտնել ընդունելի տարբերակներ, որոնցում նկատի կառնվեն բացառապես հայ ժողովրդի եւ Հայաստանի Հանրապետության պետականության շահերը:

Հավատացած ենք որ կա եւ անպայման կգտնվի խելամիտ ելք, որով շահող դուրս կգա ժողովուրդը, հակառակ պարագային հետագա դեպքերի ամբողջ պատասխանատվությունը կրելու են իշխանությունները, քանի որ նրանք ունենալով բոլոր ռեսուրսները եւ հնարավորությունները, քաղաքական կամքի դրսեւորման պարագային, ի զորու են արգելակելու չկանխատեսված զարգացումները:

Մենք չենք քաջալերել և չենք քաջալերում ծայրահեղ քայլեր ու գործողություններ, սակայն ցավով պիտի ասել եւ դառը իրականությունը խոստովանել, որ ստեղծված վտանգավոր եւ անբնական իրավիճակը, հակազդեցությունն է ՝ ՀՀ իշխանությունների գրեթե բոլոր օղակներում առկա անօրինությունների, երկրի թալանի, ժողովրդի սոցիալական ծանր վիճակի, անարդարությունների, կամայականությունների, դատական համակարգի ոչ արդարադատական վերաբերմունքի, երկրի ու ժողովրդի նկատմամբ անփութությունների, ահռելի արտագաղթի, ազատագրված տարածքների նկատմամբ միակողմանի զիջումների գնալու պատրաստակամության, Արցախի ու Հայաստանի անվտանգությունը սպառնացող քաղաքականության շարունակմանն ու ժողովուրդ-իշխանություն բաժանող վիհի հետզհետե խորացումի:

Կրկին անգամ ՀՀ իրավապահ մարմիններին և «Սասնա ծռեր» խմբի անդամներին կոչ ենք անում ցուցաբերել զսպվածություն եւ բացառել ուժային գործողությունները:

Միեւնույն ժամանակ Լատվիայի, Լիտվայի և Էստոնիայի հայկական միությունները կոչ են անում Հայ Առաքելական, Կաթոլիկ և Ավետարանչական եկեղեցիներին հորդորեն այս իրավիճակում գտնված կողմերին հարցը լուծել բացառապես խաղաղ ճանապարհով՝ որքան էլ դա լինի երկարատև: Դատապարտելի ենք համարում ՀՀ օրենքի սահմաններից դուրս տարբեր մարզերում եւ Երեւանում քաղաքացիների զանգվածային ձերբակալությունները, պահանջում անհապաղ ազատ արձակել կամայականորեն ձերբակալված քաղաքացիներին, բոլոր քաղբանտարկյալներին, ավելի չծանրացնել վիճակը:

Քաղաքացիների դեմ բռնություն գործադրելը, նրանց ձերբակալությունը եւ կալանավորումը մարդու իրավունքների բացահայտ խախտում է:

Ստեղծված իրավիճակից դուրս գալու անմիջական ելքը քաղաքական և բանակցային հանգիստ մթնոլորտի հաստատումն է եւ ժողովրդի համախմբումը:

Մենք սատարում ենք Հայաստանում մեր ժողովրդի պահանջներին՝ ՀՀ նախագահի և վարչակարգի հրաժարականին:

ՀՀ անվտանգությունը և պետական շահը թելադրում են, որ այդ փոփոխությունները տեղի ունենան առանց ցնցումների և երկրի կայունությունը վտանգելու: ՀՀ գործող ղեկավարությունը կարող է այդ գործընթացին նպաստել, առաջին հերթին կալանքից ազատելով բոլոր քաղբանտարկյալներին, հատկապես կալանավորված ազատամարտիկներին, և ապա քաղաքական այլ ուժերի հետ խորհրդակցություններ անցկացնել իր բանակցային դիրքը զորացնելու համար»:

Կոչ ենք անում սփյուռքում աշխատող հայկական կառույցներին անտարբեր չմնալ հայրենիքում տեղի ունեցող իրադարձությունների հանդեպ, և համատեղ ճնշում գործադրել ՀՀ իշխանությունների վրա, որպեսզի հայ ժողովրդի հերոս զավակների արյան գնով ազատագրված պատմական հայրենիքի՝ Արցախի, տարածքները  չհանձնվեն օտարին:

Լատվիայի, Լիտվայի և Էստոնիայի հայկական միությունները ցավակցում են զոհված ՀՀ Ոստիկանության գնդապետ Արթուր Վանոյանի հարազատներին, շուտափույթ ապաքինում մաղթում նույն իրադարձությունների ժամանակ վիրավորված բոլոր անձանց:

 

Լատվիայում ապրող հայերի անունից

Լիտվայում ապրող հայերի անունից

Էստոնիայի հայերի անունից

20 հուլիսի 2016 թ.

 

социални бутони

You can skip to the end and leave a response. Pinging is currently not allowed.

Leave a Reply

Powered by WordPress | Designed by: All Premium Themes Online. | Thanks to Top Bank Free Premium WordPress Themes, wordpress themes 2012 and
©Բոլոր իրավունքները պաշտպանված են: Մեջբերումներ անելիս հղումը www.norkhosq.net-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.norkhosq.net-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Նոր խոսք» ի ստորագրությամբ նութերի, կարծիքների եւ դիրքորոշումների համար: All Rights Reserved, www.norkhosq.net, info@norkhosq.net