«Սուրիոյ Հայերը» Գիտաժողով Պէյրութի Հայկազեան Համալսարանի Մէջ

«Սուրիոյ Հայերը» Գիտաժողով Պէյրութի Հայկազեան Համալսարանի ՄէջՊէյրութի Հայկազեան համալսարանի հայկական սփիւռքի ուսումնասիրութեան կեդրոնի կազմակերպած «Սուրիոյ հայերը» գիտաժողովին պաշտօնական բացումը կատարուեցաւ կիրակի, 24 մայիս 2015-ին, երեկոյեան ժամը 5:00-ին, Հայ աւետարանական Ա. եկեղեցւոյ հանդիսասրահին մէջ:

Լիբանանի եւ Հայաստանի քայլերգներուն յոտնկայս ունկնդրութեամբ պաշտօնապէս բացուեցաւ գիտաժողովը: Ողջոյնի խօսքով հանդէս եկաւ դոկտ. Անդրանիկ Տագէսեան: Ան Հայկազեան համալսարանի Հայկական սփիւռքի ուսումնասիրութեան կեդրոնին անունով բարի գալուստ մաղթեց գիտաժողովի բոլոր մասնակիցներուն, որոնք հասած են Ճափոնէն, Հայաստանէն, Ամերիկայէն, Եւրոպայէն, Հալէպէն ու Քեսապէն: Ան նշեց, թէ սփիւռքի հայկական գաղութներուն մէջ չկան Սուրիոյ եւ Լիբանանի նման երկու աշխարհագրականօրէն իրարու մօտիկ եւ զիրար լրացնող գաղութներ, որոնք կը կազմեն Միջին Արեւելքի հայկական գաղութներու կորիզը:

Ան յայտնեց, որ վերջին 100 տարիները վերաձեւաւորեցին Սուրիոյ գաղութը այնպէս, ինչպէս որ Ցեղասպանութենէն առաջ կ՛ապրէր բնականոն զարգացումով:

Ան ըսաւ, թէ Սուրիոյ գաղութը խորապէս պահպանած է իր աւանդութիւնները, կենցաղը, ապրելակերպը, մտածողութիւնը եւ ընտանեկան արժէքները:

Տագէսեան նկատել տուաւ, որ կազմակերպելով «Սուրիոյ հայերը» գիտաժողովը, «Լիբանանի հայերը» գիտաժողովէն ետք Հայկազեան համալսարանի հայկական սփիւռքի ուսումնասիրութեան կեդրոնը կ՛առնէ իր երկրորդ քայլը` գնահատելու եւ արժեւորելու Միջին Արեւելքի հայկական գաղութները: Ան խօսքի աւարտին շնորհակալութիւն յայտնեց Երջօ Սամուէլեանին, տէր եւ տիկին Դաւիթ եւ Թինա Սեկալին եւ «Գալուստ Կիւլպենկեան» հիմնադրամին:

«Գալուստ Կիւլպենկեան» հիմնադրամի հայկական բաժինի վարիչ-տնօրէն Ռազմիկ Փանոսեանին նամակը ընթերցեց Գարուն Շխրտմեան:

Գիտաժողովի բացման հանդիսութեան հիւր դասախօսն էր փրոֆ. Սիմոն Փայասլեան:

Ան ակնարկ մը նետեց 20-րդ դարուն հայութեան պատմական իրադարձութիւններուն, ապա մանրամասնօրէն եւ պատմական տուեալներով  ներկայացուց Սուրիոյ մէջ հայ գաղութի կազմութիւնը` կեդրոնանալով այն իրականութեան վրայ, թէ հակառակ քաղաքական ու տնտեսական պայմաններուն` հայ գաղութը իբրեւ փոքրամասնութիւն յաջողած է ինքզինք պահել լիարժէք հայ, շաղախուած է, բայց չէ ձուլուած սուրիական հասարակութեան մէջ: Ան նշեց, թէ Սուրիա ապաստան եղած է Հայոց ցեղասպանութենէն վերապրողներուն, որբերուն, որոնք տարագրուած են արեւմտեան Հայաստանէն, բայց յաջողած են վերականգնիլ, շինել տուն ու կազմել ընտանիք: Փայասլեան ըսաւ, թէ գաղութը սկսած է բարգաւաճիլ 1940-50-ական թուականներէն ետք, ապա անդրադարձաւ Սուրիոյ մէջ գործած սուրիահայ ուսումնական հաստատութիւններուն, միութիւններուն եւ մամուլին, որոնք նոյնպէս իրենց նպաստը բերած են ոչ միայն հայութեան պահպանման, այլ նաեւ Սուրիոյ զարգացման:

Անոր կատարած հիմնաւորուած վերլուծութիւններով կարելի է ուրուագծել նաեւ Սուրիոյ հայ գաղութի պատմական ընթացքը:

Փայասլեան հաստատեց, որ Սուրիոյ գաղութը ոչ միայն յաջողած է պահպանել իր ինքնութիւնը, մշակութային արժէքները, աւանդութիւնները եւ մանաւանդ լեզուն, այլ հայապահպանման օրինակ դարձած է այլ գաղութներու համար:

Ան նկատել տուաւ, թէ  գաղութը պատրաստած է բազմաթիւ ղեկավարներ, մտաւորականներ, բժիշկներ, ազգային գործիչներ, երաժիշտներ, գրողներ, հոգեւորականներ ու բանաստեղծներ, որոնք ծնունդ առնելով Հալէպէն, ծառայած են տարբեր գաղթավայրերու մէջ ու ձգած են մեծ վաստակ:

Խօսք առաւ նաեւ Հայկազեան համալսարանի նախագահ վեր. դոկտ. Փոլ Հայտոսթեան: Ան նկատել տուաւ, որ Հայկազեան համալսարանի Հայկական սփիւռքի ուսումնասիրութեան կեդրոնը իր հիմնադրութենէն ետք լուսարձակի տակ սկսաւ առնել Միջին Արեւելքի հայկական գաղութները: Միաժամանակ աշխատելով պահել այն ժառանգութիւնները, որոնք դուրս կը մնան գաղթավայրերու մեր հարթակէն:

«Սուրիոյ հայերը» գիտաժողովը կը ծրագրէ ուսումնասիրել ոչ թէ Սուրիոյ ժամանակակից խնդիրները, այլ ակադեմականօրէն ուսումնասիրել հայութեան պատմական ներկայութիւնը Սուրիոյ մէջ:

Ան հաստատեց, որ գիտաժողովը ուսումնասիրելով մեր անցեալի եւ ներկայի իրավիճակը, ներուժ պիտի տայ մեզի տեսնելու մեր ապագան` հիմնուելով զօրաւոր անցեալ ունեցող հզօր ժողովուրդի վրայ: Աւարտին, ան շնորհակալութիւն յայտնեց բոլոր մասնակիցներուն, հիւրերուն, ինչպէս նաեւ Հայկազեան համալսարանի Հայկական սփիւռքի ուսումնասիրութեան կեդրոնի տնօրէն դոկտ. Անդրանիկ Տագէսեանին:

ԱԶԴԱԿ, 25 Մայիս, 2015,

www.aztagdaily.com

 

 


сподели ме

You can skip to the end and leave a response. Pinging is currently not allowed.

Leave a Reply

Powered by WordPress | Designed by: All Premium Themes Online. | Thanks to Top Bank Free Premium WordPress Themes, wordpress themes 2012 and
©Բոլոր իրավունքները պաշտպանված են: Մեջբերումներ անելիս հղումը www.norkhosq.net-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.norkhosq.net-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Նոր խոսք» ի ստորագրությամբ նութերի, կարծիքների եւ դիրքորոշումների համար: All Rights Reserved, www.norkhosq.net, info@norkhosq.net