ՀՀ ներկայիս օրհներգը չի համապատասխանում ՀՀ խորհրդանիշ հանդիսացող զինանշանին

Միքայել  Նալբանդյանի «Իտալացի աղջկա երգը» աղավաղելով, նրա հեղինակային իրավունքը խախտելով՝ ստեղծել են «Ազատ Անկախ Հայաստանի» հիմնը: Ասածս այն է, որ արդյո՞ք Հայաստանում չկային մարդիկ, որ կարողանային նոր իրավիճակների համապատասխան մի օրհներգ մշակել, որը թե՛ պատմական, թե՛ մշակութային և թե՛ վերածնունդի և վերելքի փիլիսոփայականն իմաստ ու ոգին իր մեջ կկրեր: Խորանալով առկա օրհներգի մեջ՝ չես կարողանում գտնել վերոնշյալ ոգեղենը: Այդ օրհներգի մեջ պարփակված է ազատության մարտնչումից ծնված հայդուկային ոգին և այնքան էլ համապատասխան չէ կայացած բանակ ունեցող ազատ, անկախ երկրին: Այս «Մեր  հայրենիք»-ի մեջ չկա պատմության ընթացք, չկա պայքարած և հաղթանակած ու վերածնված ժողովրդի ոգի. մնացածը ավելորդաբանություն է և  ընդհանրապես հետաքրքիր էլ չէ, թե առաջին հանրապետության ժամանակ է հորինվել, թե Լևոնի ժամանակ: Եւ ընդհանրապես, այն, ինչը չի համապատասխանում ժամանակի ոգուն, չպետք է տաբու դարձնել: «Տաբուններն» են, որ արգելափակում են ազգերի առաջընթացն ու զարգացումը:

ՀՀ ներկայիս օրհներգը չի համապատասխանում ՀՀ խորհրդանիշ հանդիսացող զինանշանին: Իր մեջ չի պարունակում նրա վրա նշված խորհրդանիշների պատմությունն ու ոգին: Երկրի հիմնը պետք է իր մեջ պարունակի ազգի պատմությունը և, հայերիս պարագայում, պետք է ավարտվի վերածնունդով և վերելք ապրելու ոգով:

Նմանատիպ այսպես կոչված «հարց-տաբու»  առաջացավ նաև վերջերս՝ Սփյուռքի նախարարության լուծարումը կամ մնալը: Շատերը շեշտում էին այն հանգամանքը,  թե ՍՆ-ը ժողովրդի և նամանավանդ սփյուռքահայության համար ընկալվում է որպես խորհրդանիշ և անթույլատրելի է դրա լուծարումը: Այս տեսակետը պնդողները չեն խորանում խնդրի բովանդակության մեջ, թե ի՞նչ է արել այդ նախարարությունը վերջին տաս տարիների ընթացքում, այլ լոկ կառչում են սփյուռքի նախարարության ձևական գոյությունից: Մենք սփյուռքում որևէ լուրջ գործողություն չտեսանք այդ նախարարությունից: Ինձ համար մեկ է, կմնա նախարարություն, թե այլ կառույց, կարևորը գործն ու  բովանդակությունն է: Այդ նախարարություն ավելի շատ պառակտել է Սփյուռք-Հայրենիք հարաբերությունները, քան՝ մերձեցրել:

Մեկ դար է անցել և սփյուռքահայությունը չունի համասփյուռքյան կառույց, որի միջոցով ցանկացած հարցի շուրջ միաձայն և կազմակերպված հանդես կգա: Եվ օգտվելով այդ իրողությունից՝ որոշ կուսակցություններ իրենց իրավունք են վերապահում հանդես գալ ամբողջ ազգի անունից. դա անթույլատրելի է: Մեկ դար առաջ հայ ազգի ճակատագիրը մնաց մեկ կուսակցության որոշման տրամաբանության տակ և տեսանք, թե ինչ եղավ: Դա գալիս է նրանից, որ կուսակցությունններն էլ «տաբու»-ի են վերածվել և նույն տրամաբանությամբ աչք են փակում այն հանգամանքի վրա, որ իրենք ներկայացնում են ընդհամենը հասարակության որոշակի խավի կամ շերտի շահերը, բայց ներկայանում են  մի ամբողջ ազգի անունից, ինչը գիտական և բարոյական առումով անընդունելի է:

 

 

бутони към социални мрежи

You can skip to the end and leave a response. Pinging is currently not allowed.

Leave a Reply

Powered by WordPress | Designed by: All Premium Themes Online. | Thanks to Top Bank Free Premium WordPress Themes, wordpress themes 2012 and
©Բոլոր իրավունքները պաշտպանված են: Մեջբերումներ անելիս հղումը www.norkhosq.net-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.norkhosq.net-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Նոր խոսք» ի ստորագրությամբ նութերի, կարծիքների եւ դիրքորոշումների համար: All Rights Reserved, www.norkhosq.net, info@norkhosq.net