Դաշնակցությունը խրախուսում է ծեծն ու ջարդըՀայ Հեղափախական Դաշնակցության ուրախությանը չափ ու սահման չկա: Բերձորում տեղի ունեցած դեպքերից անմիջապես հետո, որտեղ ծեծի էին ենթարկվել Հիմնադիր Խորհրդարանի անդամները, դաշնակները շտապել են իրենց հրճվանքը կիսել նրանց հետ, ովքեր այդ պատժիչ գործողությունների ներշնչողն ու կազմակերպիչն են: Հայաստանի դաշնակների պահվածքը իսկույն նմանակեցին Արցախի նրանց կուսակիցները` պաշտպանելով  իշխանության վարվելակերպն ու դիրքորոշումը: Իսկ ԱԺ ՀՅԴ խմբակցության անդամ Աղվան Վարդանյանը կատարվածի ամբողջ մեղքն ու պատասխանատվությունը բարդեց ավտոերթի մասնակիցների վրա` նշելով, թե իրենց համար Հիմնադիր Խորհրդարանի աշխատանքի մեթոդները, գործելաոճը և հռչակած նպատակներն անընդունելի են, հատկապես կարգախոսը` «Ցեղասպանության 100-ամյակը` առանց ռեժիմի», դա չի կարելի կապել մեր ներքին խնդիրների հետ, որովհետև Ցեղասպանության 100-ամյակը բոլորովին այլ բան է, որտեղ պետք է համազգային համախմբվածություն: «Մեզ համար անհասկանալի է` ինչ համառությամբ այդ կազմակերպությունը արցախցիների և տարբեր ներկայացուցիչների բազմաթիվ հորդորները անտեսեց և Արցախի սահմանների ներկայիս իրավիճակում որոշեց այդ երթն իրականացնել»,- ասել է Ա. Վարդանյանը:
Եթե որևէ մեկը կշտապի իր զարմանքն արտահայտել ՀՅԴ-ի այսօրինակ պահվածքի առնչությամբ, ապա նա ետ է ընկել իրադարձությունների ընթացքից, քանի որ տեղեկացվածների համար ամեն բան խիստ հասկանալի ու պարզ է: Վերջին շաբաթների ընթացքում ՀՅԴ առանձին կառույցներից մեծ թվով մարդիկ դուրս եկան և անդամագրվեցին հենց Հիմնադիր Խորհրդարանին: Այս «կազմաքանդիչ» ակցիան չէր կարող տագնապ չհարուցել դաշնակների ճամբարում: Իսկ հիմա` Բերձորի գրոհից հետո, նրանք իրավունք ստացան հեռացածներին չարախնդորեն ասելու. «Տեսա՞ք, թե ինչ է լինում նրանց հետ, ովքեր լքում են մեզ»: Վրեժխնդրությունն արդեն այնքան է կուրացրել ՀՅԴ-ին, որ նա պատրաստ է հրապարակավ խրախուսել ծեծն ու ջարդը, բռնության այլ կարգի դրսևորումներ, եթե դրանք կիրառվում են իր մրցակիցների հանդեպ:
Բայց մի հարց էլ կա, որն անտեսել չի կարելի: Գաղտնիք չէ, որ Դաշնակցությունը մտադրվել է Ղարաբաղում առաջիկա նախագահական ընտրություններում հավակնորդների շարքում տեսնել իր թեկնածուին` ԼՂՀ փոխվարչապետ Արթուր Աղաբեկյանին: Իսկ հանուն այս մեծ նպատակի ՀՅԴ-ն այժմ պատրաստ է ոտնահարել ցանկացած սկզբունք ու բարոյականություն: Նպատակը կարդարացնի միջոցները:

споделяне в социални мрежи

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.