Քաղաքում այս որբ,
Քաղաքում այս մութ,
Որտեղ փողոցը ագռավներինն է,
Իսկ վերևներում աղավնիներն են`
Լու՜ռ,ճերմակաթույր,
Քայլում է կինը`ոտքերին փոշի,
Երկինք`կրծքի տակ:
Քաղաքում այս ցուրտ,
Քաղաքում կարմիր,
Որտեղ հայելիներ են վաճառում կույրերին,
Որտեղ փոքրիկ խանութի ապակու վրա,
Մեծ-մեծ տառերով գրված է`
Անվճար ու նոր սաթե շրջազգեստ,
Բայց գնորդ չկա,
Քայլում է կինը`աչքերին մոխիր,
Արև`սրտի տակ:
Քաղաքում այս գորշ,
Քաղաքում այս պիղծ,
Որտեղ օդը գինով է բուրում,
և փողոցի այն խոր,գաղտնի անկյունում`
մոռացված տան որբ պատուհանից`
Մոցարտ է հնչում,
Քայլում է կինը`ափերին կարոտ,
և երազանքեր`
շուրթերի վրա:
Քաղաքում այս կույր,
Քաղաքում այս խուլ,
Որտեղ փողոցը ագռավներինն է,
Որտեղ հայելիներ են վաճառում կույրերին,
Որտեղ երկնքում աղավնիներն են
և Աստված ինքն է քաղաքն այս լքում,
Քայլում է կինը`աչքերին մոխիր,
Ափերին կարոտ,
Ոտքերին փոշի,
Երկինք կրծիք տակ
և մի աշխարհաչափ ցավ`
ուսերի վրա..
Անի Հերունի Սաջյան